為了除夕初一可以放假喺屋企，前幾日換咗班長機來做。兩年無去南非，諗住有人出去就一齊去啦，於是又去咗騎馬。同行的都係14，15年join，第一次去joburg 兼第一次騎馬，就淨係得我咁貪玩⋯⋯
上次來係金黃色一片，今次就碰到青草的季節。我騎的白馬叫cloud，係女仔，好乖好聽話，最鍾意行頭。我係咁同佢講嘢，「cloud cloud食咗飯未呀」、「cloud cloud乖豬」、「cloud cloud我大脾內側好痛」、「要行快少少喎」。開始驚佢覺得呢條友做乜咁煩，導遊反而話原來佢好鍾意人同佢講嘢㗎。（但我講廣東話）雖然佢成日要跑前做第一，又不斷自己行埋一邊食草搞到我哭笑不得，但佢真係好乖，就算經過水坑都冷靜的慢慢行，好溫柔啊。
沿路睇長頸鹿，班馬，鹿仔，慢慢經過佢哋身邊，或在旁邊靜靜凝視。cloud cloud 成日平靜的低頭食草，我就鍾意俯低身摸摸佢條頸。
一片大草原，能讓動物自由走動、生活。很好。
到而家仍然覺得，如果唔太攰，既然嚟到，就點都要出去走走。and that's why I'm still here. 雖然班joburg 機又無錢又辛苦，但起碼每次都有親親大自然的愉快回憶。
-
另，如果有朋友想去騎馬，少少tips：
· 導遊的safety briefing 一定要用心聽（廢話）
· 建議將相機/ 手機掛喺身上
· 如果用手機影相而又有漫遊/ 當地卡，最好開data，同將鈴聲較到最大聲，增加萬一跌手機搵得番的機會
· 隨時都要有隻手捉住條繩，就算影相
· 即使成個tour 以慢行為主，有時馬仔聽到聲會自己小踏步，或因導遊怕佢地聚埋一齊會打交而叫佢地行快啲，所以偶爾會有小跑步，唔使緊張
-
尋日做咗半日家務，今日終於可以吃吃喝喝彈下結他。福禍無常，能夠同屋企人窩在家一齊食飯，簡簡單單過年已經好幸福。
祝新年快樂，健康平安。
Search